BARAZA LA WAFANYAKAZI LA BUCHOSA LAPITISHA BAJETI YA BILIONI 44.7 KWA MWAKA 2026/2027

Posted on: February 5th, 2026

Baraza la Wafanyakazi la Halmashauri ya Wilaya ya Buchosa lajadili na kupitisha mapendekezo ya Bajeti ya Mapato na Matumizi ya shilingi Bilioni 44.7 kwa mwaka wa fedha 2026/2027 katika Halmashauri Buchosa Mkoani Mwanza.

Akiwasilisha rasimu hiyo ya Bajeti kwa niaba ya Mkurugenzi Mtendaji Bw. Deogratius Lihengelimo ambaye ni Mkuu wa divisheni ya Mipango na uratibu ameeleza na kufafanua kwamba Halmashauri ya Buchosa kwa Mwaka wa fedha 2026/2027 inategemea kukusanya na kutumia jumla ya Shilingi 44,770,074,000.00 kutoka vyanzo mbalimbali vya halmashauri.

Katika fedha hizo shilingi 28,170,112,000.00 ni Ruzuku kutoka Serikali Kuu kwa ajili ya mishahara, Shilingi 1,853,182,000.00 ni Matumizi mengineyo, Shilingi 5,447,179,000.00 ni mapato ya ndani ya halmashauri na Shilingi 9,299,601,000.00 ni ruzuku ya Miradi ya Maendeleo.

Aidha kiasi   cha makusanyo kimeongezeka kwa silimia 3.46 ukilinganisha na Mwaka wa fedha 2025/2026 ambapo makisio yalikuwa ni shilingi 5,264,979,000.00 hii imetokana na halmashauri kuweka mikakati madhubuti ya kukusanya mapato.

Kwa upande wake Mwenyekiti wa Chama cha Wafanyakazi wa Serikali za Mitaa TALGWU Bw. Mkama Sululu ameipongeza halmashauri kwa kuandaa rasimu ya bajeti nzuri ambayo imezingatia maslahi ya  watumishi kwa kiasi kubwa ikiwemo kulipa madeni  ya watumishi  na uhamisho.

Naye Mwenyekiti wa chama cha Waalimu (CWT) Wilaya ya Sengerema Bw. Zacharia Mganda amempongeza  Mkurugenzi Mtendaji wa Halmashauri ya Buchosa Bw.Benson Peter Mihayo kwa kushirikiana na Timu Menejimenti ya halmashauri kwa kuandaa rasimu ya bajeti inayofaa kwa  imezingatia maslahi ya watumishi wa umma.

Hata hivyo, kupitia kikao hicho cha Baraza la Wafanyakazi, wajumbe walipata wasaa wa kupitia na kujadili pamoja na kutoa maoni yao juu ya Bajeti hiyo na kupongeza namna ilivyoandaliwa kitaalamu.